Manolo Pedrosa to star with Jane Oineza and Joshua Garcia
By Ruben Marasigan
Ngayong Miyerkules na, June 3, ang showing ng pelikulang ‘Stars Versus Me.’ Launching movie ito nina Maris Racal at Manolo Pedrosa mula sa direksiyon ni Joven Tan.
Si Manolo, masaya raw na finally ay nagkaroon na sila project ni Maris bilang magka-loveteam. Magkasama man sila sa serye ng ABS CBN na ‘Oh My G!’ pero ang bida rito na si Janella Salvador ang love interest niya. Unang pelikula rin nila ni Maris ito kung saan first time din nilang makatrabaho ang direktor at songwriter na si Joven Tan.
“Si Direk Joven noong hindi ko pa siya kilala, akala ko istrikto,” sabi ni Manolo nang makausap ng Philippine Showbiz Republic (PSR). “Noong nagsu-shoot na kami… sobrang chill lang pala siya. Sobrang saya ng shooting. As in… walang stress,” pagmamalaki pa nito.
Iba raw ang pakiramdam ni Manolo na mapanood ang sarili sa widescreen at nangyari ito sa kauna-unahang pagkakataon noong premiere night ng movie nila ni Maris last week.
“Sobrang nahihiya ako!” tawa niya. “Siyempre first time kong mapanood ang sarili ko sa malaking screen. So sobrang nahihiya talaga ako. Pareho kami ni Maris na nahihiya,” tawa ulit niya.
May pressure ba sa kanilang dalawa ni Maris kaugnay ng launching movie nila bilang magka-loveteam?
“Siyempre po. Kailangan din po kasi na may pressure para may motivation na galingan talaga. Kapag walang pressure, parang chill-chill lang. Kaya dapat may pressure para mas pagbutihin pa talaga.”
Looking forward ba siya na magtutuloy-tuloy na ang pagsasama nila ni Maris bilang magkapareha sa mga susunod pa nilang projects?
“Yes po. Sana!” sabay ngiti ni Manolo.
Natutuwa raw siya na full support ang fans nila ni Maris. Panay nga ang tilian ng mga ito sa mga kilig scenes nila sa pelikula. Inasahan ng ibang tagahanga nila na magkakaroon sila ng kissing scene, pero wala. Bakit nga ba wala?
“E siyempre po, minor pa lang kami. Bawal pa po kasi seventeen lang kami.
“Parang di pa po napapanahon. Baka sa next movie po naming pwede na.” sabay ngiti ulit ng Kapamilya actor.
Kumustang kasama sa trabaho si Maris bilang ka-loveteam na niya?
“Sobrang saya, kasi comfortable na ako sa kanya. We both started sa bahay ni Kuya (PBB Teen). More than three months kami roon, kaya’t masasabi kong kilala ko na siya.”
Sa tingin niya, pagkatapos ng first movie nila ni Maris ay mapapabilang na sila sa hanay ng mga itinuturing na hottest loveteams sa ngayon?
Lalo pa at noong nasa PBB pa lang sila ay may mga nabuo na ngang hukbo ng kanilang fans.
“Sa loob ng PBB, hindi namin alam kung ano ang nangyayari outside. So nagulat po kami ni Maris na paglabas namin, meron na pala kaming fans club. And grateful po ako na sobrang loyal ng fans naming dahil solid po talaga sila.”
Pagkatapos ng ‘Stars Versus Me,’ may bagong pelikula raw siyang uumpisahan under Star Cinema.
“Yung isa po ay ang ‘Bloody Crayons’ kung saan makakasama ko sina Jane Oineza at Joshua Garcia. Kasama rin po ako sa ‘Crossroads’ ng Star Cinema pa rin. Ito po ‘yung movie nina Dawn Zulueta, Richard Gomez, at Bea Alonzo. Sana kasunod nito, panibagong project para sa Marnolo (Maris-Manolo loveteam) ulit!” nangiting huling nasabi ni Manolo.
