Joey Marquez reacts on Alma Moreno’s ‘awkward’ interview
by PSR News Bureau
Kahit sabihin pang matagal na silang hiwalay ni Alma Moreno, inamin ni Joey Marquez na maging siya ay nasaktan sa mga salitang ibinabato ngayon sa dati niyang asawa na tumatakbo bilang senador pagkatapos nitong magpa-interview sa programa ni Karen Davila na Headstart sa ANC channel.
Matatandaang naging usap-usapin sa social media ang nasabing panayam dahil nahirapang sumagot si Alma sa ilang naging katanungan sa kanya na may kinalaman sa isyung pampulitika. Naging viral ang naturang video at tinuligsa ng maraming netizens ang kakayahan ni Alma na tumakbo bilang isang senador sa taong 2016.
Ayon kay Joey, “Nasasaktan ang mga anak ko. Pag anak ko na yung concerned, nagagalit ako.”
May tatlong anak sina Alam at Joey at isang adopted: sina Yeoj, Winwyn, VJ at MM.
Pero binigyang linaw ni Joey na patas ito ng pagtingin sa nasabing isyu. “Fair ako sa lahat na tinitingnan ko kung ano yung dahilan. Hindi mo maiaalis kay Karen yun kasi she’s only doing her work, it’s her credibility.”
“Sa aking pananaw lang naman, mahirap kasi yung tanong. Kahit siguro yung mga senador natin na ten years pa pinag-aralan yung RH bill, tanungin mo ng isang araw at saka yung BBL, hanggang ngayon hindi pa naipapasa dahl masusing pag-aaral pa ang kinakailangang gawin.”
