Netizens tweet nega, Robin explains
Nagbigay ng pahayag si Robin Padilla tungkol sa ginawa niyang pagsermon sa isang contestant ng Pilipinas Got Talent (PGT) na si Jiwan Kim, na isang Korean.
Ang nangyari, hindi marunong mag-Tagalog si Jiwan. Ang sermon ni Robin sa kanya, matuto raw muna itong magsalita ng Tagalog kung nais nitong makipag-cooperate siya. Hindi raw siya papayag na mag-adjust ang lahat ng hurado para sa isang banyagang hindi marunong mag-Tagalog sa kabila ng sampung taon na itong naninirahan sa Pilipinas.
Ayon kay Robin, wala siyang pinagsisisihan sa ginawa niyang pagsermon kay Jiwan kahit pa binatikos siya ng netizens sa ginawa niyang ‘yun.
“Wala akong pinagsisihan kasi, ako, pumupunta rin ako sa ibang bansa at ‘pag pumupunta ako sa ibang bansa, pinipilit kong malaman kung ano ‘yung salita dun kasi bisita ka doon, e. Ikaw ang makikibagay.
“Kung pupunta ka sa Pilipinas at uutusan mo kami at i-Inglisin mo kami sa banyagang pananalita, e, baka nagkakamali ka, kasi bayan ko ‘to. Bayan ko ‘to at handa akong mamatay anytime para sa bayan ko,” sabi ni Robin nang makausap namin siya sa bagong serye ng ABS-CBN 2 na “Sana Dalawa ang Puso” na pinagbibidahan nina Richard Yap at Jodi Sta. Maria.
Patuloy niya, “Kaya kung sasabihin mo sa ‘kin na sampung taon ka na dito at hindi ka pa rin marunong mag-Tagalog, may problema ka. Hindi mo puwedeng sabihin sa akin na mahal mo ang Pilipinas. Sabi niya (Jiwan Kim) mahal niya ang Pilipinas, may girlfriend siyang Pilipina, pero hindi siya marunong mag-Tagalog?”
Nilinaw din ni Robin na hindi niya inaway si Jiwan
“Hindi ko naman siya inaway. Sinabihan ko lang siya na parang tatay niya. Sabi ko sa kanya, ‘Ako, para akong tatay mo, tandaan mo ‘yan.”
At ang sabi naman ni Robin sa negatibong reaksyon ng netizens.
“Ganun talaga, e. ‘Di mahalin nila ang Korean kung gusto nila. Wala naman problema sa akin ‘yun. Magpakamatay sila sa Koreano kung gusto nila.
“Sampung taon na siya [sa Pilipinas].
“Kung tayong mga Pilipino hindi tayo magiging patriotic sa bansa natin, e, wag tayong humingi ng pagbabago.
“Kung tayo mananatili tayong alipin ng dayuhan, kayo na lang.
“Hindi ako magpapaalipin sa dayuhan sa bansa ko. Hindi mangyayari ‘yun.
“Ako ang hari dito dahil bansa ko ‘to.”
